Florencio Fernandez de Larrinoa Martinez de Zestafen familiak gorpuzkiak jaso ditu identifikazio prozesua osatu ostean. Haren hondakinak Cuelgamuroseko Haranean (lehen Valle de Los Caídos deitzen zen) zeuden 1959tik.
Hunkiberatasunez, justiziaz eta memoriaz betetako ekitaldia izan da Florentzioko gorpuzkiak familiari ematea, Gasteizko Gobernuaren Ordezkariordetzan.
Gorpuzkiak emate ekitaldian Maria Jesus San Jose Eusko Jaurlaritzako Justizia eta Giza Eskubideen sailburuak parte hartu du, eta ekitaldi horren garrantzia azpimarratu du. Florentzioren kasuan, bere nortasuna berreskuratzeko konpromiso instituzionala amaitu da, hainbat hamarkadatan bere senideengandik urrun ehortzita egon ondoren. Maria del Mar Daban Gobernuak Araban duen ordezkariordea ere izan da ekitaldian.
Prozesu osoaren ebazpenean funtsezkoa izan da Gogora Memoriaren, Bizikidetzaren eta Giza Eskubideen Institutuaren zeregina. Erakunde horrek beharrezko laguntza eman dio familiari lurpetik ateratzeko baimenaren administrazio-izapidetze konplexu horretan. Gainera, euskal institutuak bere gain hartu du finantzaketa, eta baliabide teknikoak eskaini ditu lagin genetikoak hartzeko, ezinbesteko urratsa baita erkaketa zientifikorako eta ondoren gorpuzkiak identifikatzeko.
Memoria Demokratikoaren Legeak babesten du lan hori.
Gogorak 2018tik egiten ditu babeste- eta laguntasun-jarduera horiek. Hala ere, lanak beste dimentsio eta lege babes bat hartu du 2023ko irailean Memoria Historiko eta Demokratikoaren Legea onartu ondoren.
Paco Etxeberrria auzitegiko mediku, auzitegi-antropologo eta Espainiako Gobernuaren aholkulariak memoria historikoaren arloan Memoria Demokratikoaren Estatu Idazkaritzan eta haren kide Lourdes Herrasti historialari eta antropologoak egindako lan konplexua erraztu duen faktore erabakigarri bat da haren gorpuzkiak banan-banako kutxa batean ehortzita zeudela. Aranzadi Zientzia Elkarteko kideak dira biak. Florentzioren senideek irautea ere akuilu handia izan da haren gorpuzkiak identifikatzeko.
Ikusi informazio gehiago Florencio Fernández de Larrinoari buruz
